SIP, STP, SWP தவறான நம்பிக்கைகளும் உண்மைகளும்...! சகாய நியோமி வி, பிரைம் இன்வெஸ்ட்மென்ட்ஸ்

 

SIP, STP, SWP தவறான நம்பிக்கைகளும் உண்மைகளும்...!

சகாய நியோமி வி, நிர்வாக இயக்குநர், பிரைம் இன்வெஸ்ட்மென்ட்ஸ்

 

பங்குச் சந்தை மற்றும் மியூச்சுவல் ஃபண்ட் முதலீடுகள் குறித்து மக்களிடையே பல்வேறு கருத்துகள் நிலவுகின்றன. அவற்றில் சில உண்மையை அடிப்படையாகக் கொண்டவை என்றாலும், பல கருத்துகள் தவறான புரிதல்களாகவே உள்ளன. குறிப்பாக தவணை முதலீடு  என்கிறா சீரான முதலீட்டுத் திட்டம் (SIP), முறையான மாற்றுத் திட்டம் (STP) மற்றும் முறையான பணப் பெறும் திட்டம் (SWP) குறித்து பரவலாக பேசப்படும் சில நம்பிக்கைகள் முதலீட்டாளர்களை சரியான முடிவுகளை எடுப்பதில் தடுமாறச் செய்கின்றன.

உண்மையில், முதலீட்டில் வெற்றி பெறுவது பங்குச் சந்தையை கணிப்பதில் அல்ல; சரியான திட்டமிடல், பொறுமை மற்றும் ஒழுங்கைத் தொடர்ந்து கடைப்பிடிப்பதில்தான் உள்ளது. எனவே, இந்த மூன்று முதலீட்டு முறைகள் குறித்த தவறான நம்பிக்கைகளையும் அதற்கான உண்மைகளையும் தெளிவாகப் புரிந்துகொள்வது மிகவும் அவசியம்.

 

தவணை முதலீடு என்றால் என்ன?

தவணை முதலீடு என்பது ஒரு குறிப்பிட்ட தொகையை, குறிப்பிட்ட கால இடைவெளியில் தொடர்ந்து முதலீடு செய்யும் முறையாகும். மாதந்தோறும் அல்லது காலாண்டுதோறும் முதலீடு செய்வது இதற்கு உதாரணமாகும். இந்த முறை சந்தை, ஏற்ற இறக்கங்களை சமநிலைப்படுத்த உதவுவதால், நீண்ட கால முதலீட்டாளர்களிடையே மிகவும் பிரபலமாக உள்ளது.

முறையான மாற்றுத் திட்டம் என்றால் என்ன?

முறையான மாற்றுத் திட்டம் என்பது ஒரே நேரத்தில் ஒரு பெரிய தொகையை பங்கு சார்ந்த முதலீட்டில் போடாமல், முதலில் பாதுகாப்பான கடன் திட்டத்தில் குறிப்பாக லிக்விட்டி மியூச்சுவல் ஃபண்ட் திட்டத்தில் வைத்துவிட்டு, அங்கிருந்து குறிப்பிட்ட இடைவெளியில் சிறு தொகைகளாக வளர்ச்சி சார்ந்த திட்டத்திற்கு மாற்றும் முறையாகும்.

இதன் மூலம் சந்தையின் ஏற்ற இறக்கங்களால் ஏற்படும் ரிஸ்க்கை ஓரளவு குறைக்க முடியும்.

 

முறையான பணப் பெறும் திட்டம் என்றால் என்ன?

முறையான பணப் பெறும் திட்டம் என்பது முதலீட்டில் இருந்து மாதந்தோறும் அல்லது குறிப்பிட்ட கால இடைவெளியில் தேவையான தொகையை எடுத்துக்கொள்ளும் முறையாகும். இது ஓய்வுபெற்றவர்கள் மட்டுமல்லாமல், மாதாந்திர வருமானம் தேவைப்படும் பலருக்கும் உதவக்கூடிய ஒரு திட்டமாகும்.

முதலீட்டாளர்கள் நம்பும் தவறான கருத்துகளும் உண்மைகளும்..!

தவறான நம்பிக்கை	உண்மை
எஸ்.ஐ.பி முறையில் முதலீடு செய்தால் எப்போதும் லாபம் கிடைக்கும்.	எந்த ஈக்விட்டி ஃபண்ட் முதலீட்டிலும் பங்குச் சந்தை ரிஸ்க் உள்ளது. தவணை முதலீடு ரிஸ்க்கை குறைக்க உதவலாம்; ஆனால் லாபத்திற்கு உத்தரவாதம் கிடைக்காது.
ஒரே தவணையில் முதலீடு செய்வது மிகவும் ரிஸ்க்கானது.	நீண்டகால முதலீட்டாளர்களுக்கு சரியான திட்டத்தில் முதலீடு செய்தால் நல்ல பலன் கிடைக்கலாம்.
பெரிய தொகை இருந்தால்தான் முதலீட்டைத் தொடங்க முடியும்.	மிகக் குறைந்த தொகையிலிருந்தே பல முதலீட்டுத் திட்டங்களை தொடங்க முடியும்.
பங்குச் சந்தை சரிந்தால் தவணை முதலீட்டை நிறுத்த வேண்டும்.	சந்தை சரிவில் தொடர்ந்து முதலீடு செய்வதால் குறைந்த விலைகளில் கூடுதல் முதலீட்டு அலகுகள் கிடைக்க வாய்ப்பு உள்ளது.
முறையான மாற்றுத் திட்டம் பணக்காரர்களுக்கானது.	பெரிய தொகையை படிப்படியாக முதலீடு செய்ய விரும்பும் எந்த முதலீட்டாளரும் இதைப் பயன்படுத்தலாம்.
முறையான பணப் பெறும் திட்டத்தில் முதலீடு விரைவில் தீர்ந்துவிடும்.	தேவைக்கேற்ப திட்டமிட்டு பணம் எடுத்தால், மீதமுள்ள முதலீடு தொடர்ந்து வளர வாய்ப்பு உள்ளது.
ஓய்வுபெற்றவர்களுக்கு மட்டுமே இந்தத் திட்டம் பயன்படும்.	மாதாந்திர வருமானம் தேவைப்படும் எந்த முதலீட்டாளருக்கும் இது உதவக்கூடும்.
வாழ்நாள் முழுவதும் ஒரே முதலீட்டு முறையையே பயன்படுத்த வேண்டும்.	வாழ்க்கை நிலை, வருமானம் மற்றும் நிதி இலக்குகளுக்கு ஏற்ப முதலீட்டு முறையை மாற்றிக் கொள்ளலாம்.
பங்குச் சந்தையை சரியாக கணித்தால்தான் வெற்றி பெற முடியும்.	தொடர்ந்து ஒழுங்குடன் முதலீடு செய்வதே நீண்டகால வெற்றியின் அடிப்படை.
வாரிசு நியமனம் செய்தால் போதும்.	முதலீட்டு விவரங்கள், கணக்கு எண்கள், முதலீட்டு நிறுவனங்கள் மற்றும் தேவையான ஆவணங்கள் பற்றிய தகவல்களையும் குடும்பத்தினரிடம் பகிர வேண்டும்.

 

ஏன் தவறான நம்பிக்கைகள் உருவாகின்றன?

பல முதலீட்டாளர்கள் சமூக ஊடகங்களில் வரும் முழுமையற்ற தகவல்களை நம்புவது, குறுகிய கால அனுபவத்தை நீண்ட கால உண்மையாக கருதுவது மற்றும் நண்பர்கள் அல்லது உறவினர்களின் ஆலோசனைகளை மட்டுமே அடிப்படையாகக் கொண்டு முடிவெடுப்பது போன்ற காரணங்களால் தவறான நம்பிக்கைகள் உருவாகின்றன.

மேலும், கடந்த காலத்தில் யாரேனும் ஒரு குறிப்பிட்ட முதலீட்டில் அதிக லாபம் பெற்றிருந்தால், அதே முடிவு எல்லோருக்கும் கிடைக்கும் என்று பலர் கருதுகின்றனர். ஆனால் முதலீட்டின் முடிவு, முதலீட்டுக் காலம், பங்குச் சந்தை நிலை மற்றும் முதலீட்டாளரின் ஒழுங்கு ஆகியவற்றைப் பொறுத்தே அமையும்.

எஸ்.ஐ.பி முதலீட்டை எப்போது தொடர வேண்டும்?

பங்குச் சந்தை உயரும்போதும், சரியும்போதும் தொடர்ந்து முதலீடு செய்வது நீண்ட காலத்தில் நல்ல ஒழுங்கை உருவாக்குகிறது. சந்தை சரிவில் முதலீட்டை நிறுத்திவிடுவது பல நேரங்களில் எதிர்கால வளர்ச்சியை இழக்கச் செய்யலாம்.

எனவே, வருமானத்தில் மாற்றம் ஏற்படாத வரை தவணை முதலீட்டை தொடர்ந்து செய்வது பல நிதி ஆலோசகர்களின் பரிந்துரையாக உள்ளது.

 

முறையான மாற்றுத் திட்டம் யாருக்கு பொருத்தமானது?

கீழ்க்கண்ட சூழ்நிலைகளில் இந்த முறை மிகவும் பயனுள்ளதாக இருக்கும்.

• ஒரே நேரத்தில் பெரிய தொகை கிடைத்தவர்கள்.
• சொத்து விற்பனை மூலம் பணம் பெற்றவர்கள்.
• ஓய்வூதிய நிதி அல்லது போனஸ் தொகை கிடைத்தவர்கள்.
• பங்குச் சந்தை நிலை குறித்து உறுதியாக தெரியாதவர்கள்.

இந்த முறையின் மூலம் முதலீட்டை கட்டுக்கோப்பாக பங்கு சார்ந்த திட்டங்களுக்கு மாற்ற முடியும்.

 

முறையான பணப் பெறும் திட்டம் யாருக்கு ஏற்றது?

இந்த முறை பின்வரும் முதலீட்டாளர்களுக்கு உதவியாக இருக்கும்.

• ஓய்வுபெற்றவர்கள்.
• மாதாந்திர கூடுதல் வருமானம் தேவைப்படுபவர்கள்.
• குழந்தைகளின் கல்விச் செலவுகளை திட்டமிட்டு மேற்கொள்ள விரும்புபவர்கள்.
• வேலை மாற்ற காலத்தில் வருமான ஆதாரம் தேவைப்படுபவர்கள்.
• 
  

ஆனால் பணம் எடுக்கும் அளவு முதலீட்டின் வளர்ச்சி விகிதத்தை விட அதிகமாக இருந்தால், முதலீட்டுத் தொகை படிப்படியாகக் குறையக்கூடும் என்பதை நினைவில் கொள்ள வேண்டும்.

முதலீட்டாளர்கள் நினைவில் கொள்ள வேண்டிய முக்கிய அம்சங்கள்:

செய்ய வேண்டியது	ஏன் முக்கியம்?
தெளிவான நிதி இலக்குகளை அமைக்கவும்.	சரியான முதலீட்டு முறையைத் தேர்வு செய்ய உதவும்.
தொடர்ந்து முதலீடு செய்யவும்.	நீண்ட கால செல்வ உருவாக்கத்திற்கு உதவும்.
முதலீட்டை காலம்தோறும் மதிப்பாய்வு செய்யவும்.	இலக்குகளுக்கு ஏற்ப மாற்றங்களைச் செய்ய முடியும்.
வாரிசு விவரங்களையும் ஆவணங்களையும் புதுப்பித்து வைத்திருக்கவும்.	குடும்பத்தினருக்கு சிக்கல்கள் ஏற்படாமல் இருக்கும்.
முதலீடுகளைப் பரவலாகப் பிரித்து வைத்திருக்கவும்.	ரிஸ்க்கை குறைக்க உதவும்.

 

தவணை முதலீடு, முறையான மாற்றுத் திட்டம் மற்றும் முறையான பணப் பெறும் திட்டம் ஆகியவை ஒவ்வொன்றும் வெவ்வேறு தேவைகளுக்காக உருவாக்கப்பட்ட முதலீட்டு முறைகள். இதில் எது சிறந்தது என்பது அனைவருக்கும் ஒரே மாதிரியாக இருக்காது. முதலீட்டாளரின் வயது, வருமானம், நிதி இலக்குகள், ரிஸ்க்கை ஏற்கும் திறன் மற்றும் முதலீட்டு காலம் ஆகியவற்றைப் பொறுத்தே சரியான தேர்வு அமையும்.

முதலீட்டில் வெற்றி பெறுவதற்கு பங்குச் சந்தையை தினமும் கணிப்பதை விட, சரியான திட்டத்தைத் தேர்ந்தெடுத்து தொடர்ந்து ஒழுக்கத்துடன் செயல்படுவது மிகவும் முக்கியம். தவறான நம்பிக்கைகளை விட்டு விலகி, உண்மைகளைப் புரிந்துகொண்டு முதலீடு செய்தால், நீண்டகாலத்தில் செல்வத்தை உருவாக்கும் வாய்ப்பு அதிகரிக்கும்.

கூடுதல் தகவல்கள் மற்றும் முதலீட்டுக்கு….

வி. சகாய நியோமி

PRIME INVESTMENTS

AMFI பதிவுசெய்யப்பட்ட மியூச்சுவல் ஃபண்ட் விநியோகஸ்தர்

-ARN  131130

தொலைபேசி எண்: 95783 25902/ 98430 96187

இமெயில் முகவரி: Sahai.neomi@gmail.com

மதுரையை சேர்ந்த பிரைம் இன்வெஸ்ட்மென்ட்ஸ் நிறுவனம், ஆயுள் காப்பீடு, மருத்துவக் காப்பீடு, மியூச்சுவல் ஃபண்டுகள், நிதித் திட்டமிடல் ஆகிய சேவைகளை அளித்து வருகிறது..

முன்னணி தனிநபர் நிதி இதழ் நாணயம் விகடனில்  வி. சகாய நியோமி எழுதிய கட்டுரைகளைப் படிக்க https://bit.ly/4qEt1kd

Disclaimer:

மியூச்சுவல் ஃபண்ட் முதலீடு சந்தை  ரிஸ்க்களுக்கு உட்பட்டது. முதலீடு செய்யும் முன் திட்டம் சார்ந்த அனைத்து ஆவணங்களையும் சரியாகப் படித்துப் பார்க்குமாறு அறிவுறுத்தப்படுகிறது. மியூச்சுவல் ஃபண்ட் மூலம் நிச்சயமான ஆதாயங்கள் கிடைக்கும் என்பதற்கு உத்தரவாதம் கிடையாது.